کابل
د لړم ١٩ ١٣٨٨، پژواک خبري اژانس
د اروپايي ټولنې مشر او د سويډن د بهرنيو چارو وزير هم دافغانستان په نوي حکومت کې له اداري فساد سره د مبارزې غوښتنه وکړه .
د سويډن د بهرنيو چارو وزير کارل بيلټ، چې د اروپايي ټولنې مشري يې هم په غاړه ده، د لړم په ١٩مه، په کابل کې د افغانستان د بهرنيو چارو له وزير ډاکټر رنګين دادفر سپنتا سره ديوه ګډ خبري کنفرانس پر مهال يادې شوې څرګندونې وکړې .
هغه زياته کړه چې دوى او نړيواله ټولنه په افغانستان د سولې اوثبات لپاره کار کوي او دامنيت په برخه کې له افغان حکومت سره مرسته کوي .
خو نوموړي په ډاګه کړه چې دافغانستان حکومت بايد خپل ولس ته حساب ورکوونکى وي .
ډاکټر سپنتا په ياده شوي کنفرانس کې وويل چې له کارل بيلټ سره يې د لومړنيو اړتياوو ترڅنګ ، دانرژۍ، کرنې، ښوونې او روزنې په برخه او د اداري فساد پر وړاندې د مبارزې په اړه خبرې وکړې .
نوموړي دافغانستان په کورنيو چارو کې ديو شمېر هېوادونو دلاسوهنو دغندنې ترڅنګ وويل چې افغانستان يو خپلواک هېواد دى او خپله بهرنۍ تګلاره پخپله ټاکي.
ډاکټر سپنتا د اداري فساد پر وړاندې په مبارزه کې د نړيوالې ټولنې له مرستو قدرداني وکړه.
هغه، ددې په اړه چې يو شمېر هېوادونه په نوي حکومت کې د جنګسالارانو د ونډې په اړه نيوکې کوي وويل، چې پخوا حکومت ددغه کار مخنيوى کاوه، خو بهرنيو هېوادونو له دې کار سره مخالفت وکړ .
سپنتا له بهرنيو هېوادونو وغوښتل چې له حکومت څخه د جنګسالارانو د ګوښه کولو غوښتنې دې د خپلو شخصي ګټو لپاره نه کوي .
ديادونې وړ ده ، چې سوېډن په افغانستان کې د ايساف په چوکاټ کې ٥٠٠ سرتېري لري، چې په بلخ ولايت کې مېشت دي .
|
